Lausnir við tónlistargetraun #4

Þá hafa mér borist ágiskanir frá sjö þátttakendum í tónlistar-getrauninni. Ég hefði reyndar viljað sjá fleiri taka þátt en þetta er nú samt alveg hin sæmilegasta þáttaka.

Keppendur voru þessir:

• Ari Guðmunds
• Arnar Valgeir
• Ástþór
• Boggi
• Henry
• Jón Helgi
• Þóranna

Og hér koma rétt svör:

#1. Reef – Place your hands
Fjórir þáttakendur með þetta rétt, þrír með rangt. Arnar giskaði á She’s My Sister með Stone Roses, Henry giskaði á eitthvað með Dave Matthews Band og Ari skilaði auðu.

#2. Crash Test Dummies – Afternoons & Coffeespoons
Klassískur smellur frá 90s bandinu með djúpraddaða söngvarann. Arnar og Ari skiluðu auðu á þetta lag, aðrir voru með þetta á hreinu.

#3. Men at Work – Down Under
Einslagsundirð frá Ástralíu. Mjög 80s. Þetta voru allir með rétt, þótt sumir hafi ekki verið með titilinn alveg á hreinu. Land Under, Land Down Under og Down Under voru þó allt saman fullnægjandi ágiskanir.

#4. The Hives – Hate to Say I Told You So
Arnar og Ástþór héldu báðir að þetta væri Song 2 með Blur en aðrir svöruðu þessu rétt.

#5. Gary Glitter – Rock & Roll, Part 2
Þetta átti að vera rosa erfitt en reyndist auðveldara en ég hélt, þar sem fjórir voru með rétta lausn við þessu. Jón Helgi giskaði á eitthvað með Ozzy, Bogga fannst þetta hljóma eins og Talking Heads en var ekki alveg viss og Ástþór giskaði nokkuð skemmtilega á að þetta væri lagið Hey með The Wumwum Band.

#6. Tvíhöfði – La la la la Doddi litli
Þetta var kannski frekar kvikindislegt af mér, bjóst ekki við að neinn myndi geta þetta. En Boggi og Arnar eru greinilega með Tvíhöfðann sinn á hreinu og könnuðust strax við þetta. Þetta lag er reyndar flutt af Sverri Stormsker og Dodda litla, sem ég vissi ekki fyrr en Boggi benti mér á það, en það er allavega á Tvíhöfðaplötunni Til Hamingju svo ég tel þetta sem Tvíhöfðalag. En já, Arar og Boggi gátu þetta sem sagt rétt, Tóta giskaði á eitthvað með Baggalúti, Jón Helgi og Ástþór voru báðir nokkuð nálægt því og giskuðu á að þetta væru Fóstbræður og Ari giskaði einfaldlega á að þetta væri “eitthvað íslenskt”. Henry skilaði auðu.

#7. Garbage – Only Happy When It Rains
Ari, Arnar og Jón Helgi voru með rétta svarið við þessu. Tóta var alveg ofsalega nálægt því, munaði bara einu orði. Hún giskaði á Only Happens When It Rains, sem ég gat því miður ekki gefið rétt fyrir. Henry var með Garbage á hreinu en ruglaðist á lögum og giskaði á Stupid Girl. Boggi giskaði út í bláinn á lagið Nondurkin með hljómsveitinni Durkin Love og Ástþór hélt að þetta væri hljómsveitin Catatonia með lagið Drop Dead Gorgeous.

#8. Jet Black Joe – I, You, We
Þetta var gefins. Allir með þetta rétt.

#9. The Cardigans – Hanging Around
Arnar, Ari og Boggi héldu allir að þetta væri Every You, Every Me með Placebo og Henry giskaði á Radiohead. Aðrir svöruðu réttu.

#10. Muse – New Born
Þetta virtist ekki vefjast fyrir neinum. Allir með þetta rétt.

Stigin féllu sem hér segir:

• 1. Þóranna – 25
• 2. Jón Helgi – 24
• 3. Boggi – 21
• 4. Henry – 19
• 5. Ástþór – 18
• 6. Arnar Valgeir – 18
• 7. Ari Guðmunds – 18

Ástþór, Arnar og Ari voru með jafnmörg stig, en skiluðu inn í þeirri röð sem stigataflan sýnir, Ástþór fyrstur og Ari síðastur.

Og þar með er hún Þóranna Hrönn Þórsdóttir krýndur meistari tónlistargetraunar Andra Hugo í þetta sinn og hefur því tryggt sér montréttinn fram að næstu getraun. Til hamingju með það, Tóta!

Tónlistargetraun #4

Svona fyrst það eru að koma jól og prófleiðinn sjálfsagt að drepa marga þá held ég að það sé tilvalið að fólk slíti sig frá bókunum og spreyti sig á eins og einni léttri getraun. Þetta er fjórða getraunin sem ég set saman og finn ég fyrir því að það verður erfiðara og erfiðara að setja þær saman eftir því sem þær verða fleiri, þar sem maður fer að verða uppiskroppa með hugmyndir að lögum sem sem flestir ættu að þekkja.

En ég held mér hafi tekist nokkuð vel til með að finna gott jafnvægi milli auðveldra og erfiðra laga í þessari getraun. Maður veit þó aldrei nákvæmlega með það, þar sem stundum vita allir það sem ég held að sé erfitt og fáir þekkja það sem ég hélt að allir gætu. Svo þetta er svolítið tvísýnt oft.

En jæja, þá að leiknum. Getraunin samanstendur af brotum úr 10 lögum sem ég hef klippt saman. Í brotunum eru engir textar, aðeins laglínur, sóló og melódíur sem ættu að kveikja á perunni hjá ykkur. Og, eins og alltaf vil ég fá ágiskanir frá sem flestum, alveg sama hversu vel eða illa þið haldið að þið hafið staðið ykkur. Það eru ekki margir sem eru með þetta allt á hreinu og því þarf enginn að skammast sín fyrir furðulegar ágiskanir. Því fleiri sem taka þátt, því skemmtilegri verður leikurinn.

Stigagjöfinni er þannig háttað:

Réttur flytjandi = 1 stig
Rétt nafn á lagi = 1 stig
Réttur flytjandi og rétt nafn á lagi = 3 stig

Mest er hægt að fá 30 stig í heild fyrir að giska rétt á alla flytjendur og heiti allra laga.

Getraunina má nálgast með því að smella hér eða einfaldlega smella á play hér fyrir neðan.

Svör berist svo til mín á MSN eða í gegnum e-mail (hvoru tveggja er andrihugo[hjá]hotmail.com). Vinsamlegast svarið ekki í comentakerfið!

Heim á leið

Jæja, þá eru ekki nema rétt rúmir tveir sólarhringar þar til maður fer að skríða í loftið frá Eindhoven flugvelli. Já, Eindhoven. Meira vesenið að geta ekki flogið beint frá Amsterdam, sem ég hefði svo sem getað gert hefði ég beðið og tekið sénsinn á Icelandair. En mér fannst betra að gera þetta tímanlega og taka Iceland Express pakkann á þetta, því hann var ódýrari kosturinn þá. Ekki að það skipti neitt miklu máli svo sem… Express er í eigu Icelandair núna svo það er lítil sem engin samkeppni á þessum markaði lengur, svo Icelandair geta sprengt þessi verð upp úr öllu valdi án teljandi áhyggja. Sniðugt að kaupa svo upp alla samkeppnisaðila til að útrýma allri sanngirni á verðlagi. Andskotans ástand! En maður þegir auðvitað bara og lætur vaða yfir sig eins og vanalega.

En mikil skelfingar ósköp verður nú gott að komast heim maður! Þetta er búin að vera löng bið, alveg síðan í janúar. En maður hefur haft mikið meira að gera eftir áramót heldur en fyrir þau, þannig að tíminn hefur liðið mun hraðar. Og nú tekur við 2ja vikna sumarfrí sem verður nýtt til hins ítrasta. Svo ítarlega mun ég nýta mér það að ég tek mér meira að segja 3 daga aukalega í frí, svo ég þurfi nú ekki að stinga af á miðri Þjóðhátíð. Hef fram til miðvikudagsins 6. ágúst að jafna mig eftir hátíðina og koma mér aftur út og í skólann. Þá tekur við lokaspretturinn í náminu sem verður ansi annasamur.

Annars er bara alveg fínt að frétta. Ég nenni samt ekki að telja upp hvað það er sem er að frétta, svo þið verðið bara að trúa mér þegar ég segi að það sé “fínt” að frétta. Læt það nægja að sinni.

Það var skítt hvernig fór fyrir Hollendingum í Evrópukeppninni. En þeir duttu úr keppni á móti sprækum Rússum sem þjálfaðir eru af Guus Hiddink, sem er auðvitað goðsögn hérna í Hollandi. Svo þetta var ekki eins slæmt áfall og, segjum, ef þeir hefðu dottið út á móti Þýskalandi. Það hefði verið óbærilegt fyrir landann hér.

Jæja, ég nenni þessu ekki. Ætla að slútta þessu á nýju lagi hérna. Þetta er af nýrri plötu með meistara Beck og heitir Youthless. Grúúúúví sjitt!

Sjáumst!

Lausnir við tónlistargetraun #3

Jæja, þá hafa mér borist ágiskanir frá 7 þáttakendum í tónlistargetrauninni, sem er nokkuð góð þáttaka bara. Ég get ekki verið annað en sáttur við það. Það var líka gaman að sjá að fólk var allavega að giska þótt það væri ekki endilega með allt saman á hreinu.

Keppendur voru þessir:

• Ástþór
• Jón Helgi
• Sindri Freyr
• Stefán Barga
• Sunna
• Tóta
• Viktor Smári

Og lögin voru sem sagt þessi:

#1. Lenny Kravitz – Rock and Roll Is Dead
Þetta höfðu allir rétt nema Tóta, sem giskaði á hljómsveitina Deep Purple (engin ágiskun á nafn lagsins hjá henni).

#2. Space Hog – In The Meantime
Gamall og góður 90s smellur, eitt af fjölmörgum einslagsundrum frá þessum tíma. Sindri Freyr var sá eini sem fékk 3 stig fyrir þetta. Ástþór vissi hvað lagið hét og Stebbi var með hljómsveitina, en hann giskaði á að lagið héti “In the Moment”. Ekki fráleidd ágiskun, Stebbi, en ég gat því miður ekki gefið þér rétt fyrir þetta. Aðrir skiluðu auðu á þetta lag.

#3. Boston – More Than a Feeling
Þetta voru allir með á hreinu, enda auðþekkjanlegt og klassískt lag.

#4. Otis Reading – Dock of the Bay
Þessu svöruðu allir rétt nema Viktor Smári og Jón Helgi. Viktor giskaði nokkuð skemmtilega á “Flautulag” meðan Jón Helgi sleppti því alfarið að giska.

#5. Manic Street Preachers – If You Tolerate This Your Children Will Be Next
Þetta lag flæktist ekki fyrir neinum. Allir með þetta rétt.

#6. Dexy’s Midnight Runners – Come On Eilene
Fimm af sjö þáttakendum voru með þetta alveg á kristaltæru. Jón Helgi og Sunna slepptu því hins vegar bæði að giska.

#7. Pelican – Jenny Darling
Þetta var sennilega erfiðasta lagið í þessari getraun, enda hafði ég þetta með af ásettu ráði til að gera ykkur svolítið erfiðara fyrir. Pétur Kristjáns og félagar í Pelican fluttur lagið Jenny Darling. Stebbi var einn með 3 stig fyrir þetta. Ástþór fékk 1 stig fyrir að geta nafnið á laginu, en var hins vegar ekki með hljómsveitina á hreinu. Tótu fannst þetta hljóma eins og eitthvað með Monty Python og Sindri ákvað að giska út í loftið og skaut á “Dancing in the Moonlight” með Thin Lizzy. Aðrir svöruðu engu.

#8. Toto – Hold the Line
Viktor, Sunna og Stebbi fengu öll 3 stig fyrir þetta. Tóta fékk stig fyrir að geta hljómsveitina rétt, en eins og Nonni, Ástþór og Sindri Freyr, giskaði hún á að lagið héti “Love Isn’t Always on Time”, sem er vissulega lína úr laginu, en ekki titill þess. Nonni og Sindri héldu svo að þetta væri hljósveitin Foreigner, meðan Ástþór giskaði á Boston.

#9. Dire Straits – Walk of Life
Tóta, Jón, Viktor, Sindri og Stebbi fengu fyrir þetta 3 stig. Ástþór fékk 1, en hann giskaði á að lagið héti “Walk All Night”. Close, but no cigar, Ástþór. Sunna gaf skít í þetta og svaraði “Eitthvað suðurríkja drasl!”. Ekki aldeilis, Sunna mín.

#10. Tweety – Gott Mál
Eins og hitt íslenska lagið í þessari getraun, þá var þetta í erfiðari kantinum. Stebbi og Tóta voru með þetta alveg hárrétt, meðan Ástþór var með hljómsveitina á hreinu, en giskaði á lagið “Krösj (eða einhver enskusletta)”. Ekki vitlaus ágiskun svo sem, þar sem er farið mjög frjálslega með enskuslettur í þessu lagi. Annars giskuðu Sindri og Sunna á hljómsveitina Todmobile; Sunna svaraði engu lagi meðan Sindri sagði Stúlkan. Viktor smári hélt einnig að lagið héti Stúlkan, en giskaði nokkuð furðulega á að Sykurmolarnir væru flytjendur. Jón Helgi giskaði ekki á þetta.

Stigin féllu sem hér segir:

• 1. Stefán Braga – 28
• 2. Sindri Freyr – 21
• 3. Tóta – 19
• 4. Ástþór – 19 (Jafnmörk stig og Tóta, en skilaði svörum inn seinna)
• 5. Viktor Smári – 18
• 6. Sunna – 15
• 7. Jón Helgi – 12

Og þar hafið þið það. Stefán Bragason kom óvæntur inn í keppnina á lokasprettinum og svaraði öllu rétt, nema hann var með nafnið á einu laginu vitlaust og var því aðeins hársbreidd frá fullu húsi stiga. Til hamingju með sigurinn, Stebbi! Þú hefur eignað þér montréttinn fram að næstu getraun.

Tónlistargetraun #3

Ég ætti nú að vera læra undir próf eins og er, en auðvitað finnur maður sér eitthvað annað og “betra” að gera undir slíkum kringumstæðum. Þannig að ég ákvað að smella saman eins og einni tónlistargetraun, svona aðeins til að endurvekja þennan fína leik. Það er komið rétt rúmlega ár síðan ég var síðast með tónlistargetraun, eða þann 11. maí í fyrra. Þannig að það er löngu kominn tími á nýja getraun.

Það var ágætis þátttaka síðast og ég vona að hún verði allavega jafngóð núna, ef ekki betri. Því fleiri sem taka þátt, því skemmtilegri verður leikurinn. Og ekkert vera hafa áhyggjur af því ef þið séuð ekki með þetta alveg 100% á hreinu. Sendið mér bara svörin við því sem þið vitið eða haldið að þið vitið, eða giskið bara á það sem þið vitið ekki eða eruð í vafa með. Mér er skítsama hvernig svörin líta út, svo lengi sem ég fái svör frá sem flestum!

Jæja, snúum okkur þá að leiknum. Getraunin samanstendur af brotum úr 10 lögum sem ég hef klippt saman. Í brotunum eru engir textar, aðeins laglínur, sóló og melódíur sem ættu að kveikja á perunni hjá ykkur. Ég held að þessi getraun sé kannski í við erfiðari en síðast, en þó veit ég ekki. Síðasta getraun fannst mér (og ykkur sem tókuð þátt) aðeins og auðveld, svo ég lofaði því að sú næsta yrði aðeins strembnari. En þetta er alls ekki of erfitt, það eru lög þarna sem allir eiga að þekkja og kannast við og svo kannski 2-3 lög sem ættu að flækjast fyrir sumum.

Stigagjöfinni er þannig háttað:

Réttur flytjandi = 1 stig
Rétt nafn á lagi = 1 stig
Réttur flytjandi og rétt nafn á lagi = 3 stig

Mest er hægt að fá 30 stig í heild fyrir að giska rétt á alla flytjendur og heiti allra laga.

Getraunina má nálgast með því að smella hér eða einfaldlega smella á play hér fyrir neðan.

Svör berist svo til mín á MSN eða í gegnum e-mail (hvoru tveggja er andrihugo[hjá]hotmail.com). Vinsamlegast svarið ekki í comentakerfið!

Gleðilegt ár!

Topp 10 plötur ársins 2007

Ég hef aldrei verið mikið fyrir að gera lista, finnst leiðinlegt að negla niður svona ákveðna hluti án fyrirvara um breytingar. En ég fékk þá áskorun um að gera topp 10 lista yfir bestu plötur ársins og verð eiginlega að verða við þeirri bón. Hér eru því bestu plötur ársins að mínu mati, af þeim plötum sem ég komst yfir á árinu. Eflaust eru fjölmargar fínar plötur sem ég hlustaði ekki á á árinu, enda ekki hægt að ætlast til þess að maður komist yfir að hlusta á alla flóruna.

#10 – Feist – The Reminder

Leslie Feist, eða Feist eins og hún kallar sig bara, er kanadísk tónlistar- og söngkona. Ég hafði ekkert heyrt um þessa hnátu fyrr en ég sá hana spila hjá Jay Leno einhvern tímann á árinu. Hún hreif mig það mikið að ég ákvað að kanna tónlist hennar betur og kom hún mér alveg skemmtilega á óvart. Fjölbreytt og skemmtileg poppplata sem ég mæli með að fólki kynni sér betur.

Lög sem standa upp úr: My Moon My Man, Sea Lion Woman og The Limit to Your Love

#9 – Arctic Monkeys – Favourite Worst Nightmare

Sjálfstætt framhald af fyrri plötu sveitarinnar. Ég bjóst í rauninni við betri plötu og varð örlítið fyrir vonbrigðum eftir fyrstu hlustun. En því meira sem maður hlustar á plötuna, því meira vinnur hún á, eins og margar góðar plötur eiga það til að gera. Blátt áfram skemmtirokk af bestu gerð og ég held að þessir drengir eigi mikið inni ennþá. Það verður gaman að fylgjast með þeim í framtíðinni.

Lög sem standa upp úr: Brainstorm, Teddy Picker og D Is for Dangerous

#8 – Modest Mouse – We Were Dead Before the Ship Even Sank

Ég hef lengi verið hrifinn af Modest Mouse. En mér hefur oft fundist þeim vanta jafnvægi á plötum sínum; þeir hafa komið með marga frábæra slagara inn á milli annarra síðri laga og hafa plöturnar þeirra oft verið óheilsteyptar og svolítið stefnulausar fyrir vikið. En á síðustu tveimur plötum þeirra hafa þeir sýnt miklar framfarir á þessu sviði, greinilegt að þeir hafa farið mikið fram í tónlistarlegum þroska og hafa náð að skapa skemmtilega heildarmynd sem þeir geta réttilega kallað sína eigin. Á þessari plötu halda þeir áfram þar sem frá var horfið á plötunni Good News For People Who Love Bad News frá árinu 2004 og afraksturinn er virkilega ánægjulegur.

Lög sem standa upp úr: Missed the Boat, We’ve Got Everything og Dashboard

#7 – !!! – Myth Takes

Maður veit eiginlega ekki hvað maður á að segja um hljómsveitina !!! (oftast borið fram CHK-CHK-CHK), eða hvernig maður á að lýsa tónlist þeirra. Þeir taka áhrif úr bókstaflega öllum áttum og blanda því saman í fáránlega kraftmikla grúv- og fönkveislu. Niðurstaðan er ómótstæðileg partýmússík, þó svo að á köflum sé eiginlega of mikið að gerast hjá þeim í einu. Engu að síður, alveg frábær plata frá einstakri hljómsveit sem hefur getið sér orð sem ein albesta tónleikasveit heims þessa dagana. Ég hefði viljað vera á landinu þegar þeir spiluðu á Airwaves fyrr á þessu ári, jafnvel þó það hefði bara verið til að sjá þessa hljómsveit á sviði.

Lög sem standa upp úr: A New Name, Yadnus, Sweet Life og Bend Over Beethoven

#6 – Travis – The Boy With No Name

Eftir plötuna 12 Memories frá 2003 hélt maður bara að Travis hefðu lagt upp laupana. Platan hlaut enga sérstaka dóma og mistókst svolítið að fylgja eftir The Invisible Band frá 2001, sem var alveg stórkostleg plata. En svo komu þeir öllum á óvart á þessu ári með þessari stórfínu plötu, sem mér finnst persónulega ekkert mikið síðri en The Invisible Band. Vinaleg og einstaklega þægileg popp/rokk mússík sem ætti að gleðja hverja sál.

Lög sem standa upp úr: Selfish Jean, Battleship og My Eyes

#5 – Chromeo – Fancy Footwork

Þessa hljómsveit rakst á fyrir tilviljun á einhverju spjallborði stuttu áður en ég flutti út til Amsterdam í haust. Platan hreif mig það mikið að ég hlustaði á lítið annað þarna úti fyrstu vikurnar og veðrur þetta fyrir vikið ævinlega “Amsterdam platan” í mínum huga, ein af þessum plötum sem maður tengir við ákveðið tímabil eða uppákomur í lífi sínu. En platan er annars virkilega skemmtileg. Chromeo er kanadískur dúett sem spilar rafræna poppmússík með 80s syntha- og fönk ívafi. Ég mæli sterklega með þessu fyrir næsta partý!

Lög sem standa upp úr: Bonafied Lovin’ (Though Guys) og Opening Up (Ce Soir on Danse)

#4 – The Shins – Wincing the Night Away

Önnur “tímabils plata” fyrir mig, enda hlustaði ég látlaust á þessa plötu á loðnuvertíðinni á Vinnslustöðinni á þessu ári. Eins og Modest Mouse, þá hefur mér alltaf þótt The Shins vera gríðarlega efnileg hljómsveit, en plötur þeirra hafa mér hins vegar hingað til alltaf þótt vera voðalega misjafnar og óstöðugar; það er að segja þar til kom að þessari plötu. Þessi plata er algjört gull frá upphafi til enda og finnst mér hljómsveitin loksins hafa uppfyllt hæfileika sína með frábærum tónsmíðum og grípandi laglínum.

Lög sem standa upp úr: Phantom Limb, Turn On Me, Red Rabbits og Girl Sailor

#3 – Radiohead – In Rainbows

Maður var orðinn ansi skeptískur á nýju Radiohead plötuna. Eftir allt sem á undan hafði gengið, frestanir á frestanir ofan og fréttir af ósætti meðal hljómsveitarmeðlima um stefnuna sem platan átti að taka, tókst þeim að reiða fram enn eitt meistaraverkið. Ég segi ekki að þessi plata toppi eitt eða neitt sem þeir hafa gert áður – enda virðast þeir alltaf ná að brydda upp á einhverju nýju fyrir hverja plötu – en hún er a.m.k. jafngóð og flest annað sem þeir hafa gert hingað til.

Lög sem standa upp úr: All I Need, House of Cards, 15 Steps og Jigsaw Falling Into Place

#2 – Queens of the Stone Age – Era Vulgaris

Eins og James Hetfield og var konungur gítar riffanna þegar hann var upp á sitt besta, þá er Josh Homme kóngurinn í dag. Og það sem meira er, er að Hr. Homme tekst að gera nokkurn veginn nákvæmlega það sem honum sýnist og heilla markaðinn upp úr skónum á sama tíma og hann er trúr sinni eigin stefnu og hugmyndum. Fágætir snillingar hér á ferð sem virðast ekki geta stigið feilspor í einu eða neinu sem þeir taka sér fyrir hendur. Platan sjálf er kannski ekki það besta sem hefur komið frá sveitinni, enda erfitt að toppa alla snilldina sem á undan hefur komið. En Era Vulgaris olli mér allavega engum vonbrigðum.

Lög sem standa upp úr: Misfit Love, Turning on the Screw, 3s & 7s, Sick Sick Sick, og I’m Designer

#1 – Kings of Leon – Because of the Times

Plata ársins, árið 2007, er að mínu mati Because of the Times með hljómsveitinni Kins of Leon. Kannski er ég hlutdrægur, þar sem þessi hljómsveit hefur verið í gríðarlegu uppáhaldi hjá mér síðan þeir stigu fyrst fram á sjónarsviðið, en ég held með fullri sannfæringu að það geti ekki nokkur einasti tónlistarunnandi litið fram hjá þessari plötu í valinu um bestu plötur ársins. Þetta er þriðja plata sveitarinnar og með hverri plötu hafa þeir sýnt ótrúlegar framfarir, hvort sem það er í hljóðfæraleik, lagasmíðum, stílsköpun eða einhverju öðru. Þeim hefur farið fram á öllum sviðum frá plötu til plötu og er engin undantekning á því hér. Það verður virkilega gaman að sjá hvort þeim takist að halda áfram á sömu braut, því ef svo er þá erum við að tala um að næsta plata þeirra verði algjört meistaraverk!

Lög sem standa upp úr: My Party, Knocked Up, Charmer, Ragoo og Fans

Eins og sjá má hlustaði ég voðalega lítið á íslenska tónlist þetta árið, en það sem stóð upp úr á þeim vettvangi voru tvær plötur í sama geira; annars vegar platan Fnykur með Samúeli Jóni Samúelssyni og hins vegar platan Shake It Good með Jagúar, þar sem Samúel spilar auðvitað stórt hlutverk líka. Þannig að tónlistarmaður ársins á Íslandi að mínu mati er án vafa Samúel Jón Samúelsson.

En hvað segið þið? Sammála um eitthvað af þessu? Ósammála? Endilega deilið skoðunum ykkar með mér og öðrum lesendum.

Let It Snow með Fret Killer

Ég lofaði ykkur fleiri jólalögum og hér kemur eitt í YouTube formi. Þetta er gaur sem kallar sig Fret Killer og er einn af mínum uppáhalds YouTube tónlistar-mönnum. Algjör snillingur á gítarinn en það veit enginn hver þetta er í rauninni. Það hafa ýmsar getgátur komið upp um það hver sé þarna á ferð, en hann fer alltaf huldu höfði í myndböndum sínum og lætur gítarinn einfaldlega tala sínu máli, auk söngsins auðvitað í þeim lögum sem það á við.

Allavega, hér er lagið Let It Snow með Fret Killer.

(Það virðist ekki virka að pósta þessu vídeói á bloggið hjá mér, svo ég býð ykkur bara upp á beinan tengil á þetta í staðinn.)

Annnars mæli ég með að þið skoðið fleiri myndbönd á YouTube síðunni hjá Fret Killer. Hann er með nokkur jólalög þarna, fyrir þá sem vilja koma sér í jólaskapið með ljúfum kassagítartónum. En fyrir utan jólalögin er hann líka með fleiri mjög skemmtileg vídeó, eins og t.d. The Etowah Shuffle sem er í sérstöku uppáhaldi hjá mér þessa dagana. Gott stöff!

PS: Ný könnun!

Under the Bridge

Án vafa einhver albesta útgáfa sem ég hef heyrt af þessu lagi.

Gleðilegan jólamánuð

Jújú, mikið rétt, jólin eru á næsta leiti, hvorki meira né minna! Ég held ég hafi bara aldrei upplifað jafn fljóttlíðandi ár eins og þetta. Það er ótrúlegt að hugsa til þess að það sé ekki liðið nema tæpt ár síðan ég lá flatmagandi í Kaliforníusólinni síðastliðinn aðfangadag. Það voru vissulega óvenjuleg jólin hjá mér í fyrra, í sólskini og 25° hita. Það var allavega mjög sérstök upplifun að hlusta á jólalögin í svoleiðis umhverfi. En á þessu ári verð ég heima í Vestmannaeyjum um jólin. Nánasta fjölskylda mín verður reyndar í Bandaríkjunum, en mér er boðið í mat og matarboð, bæði á aðfangadag og jóladag, til fjölskyldu og vina. Þannig að ég kem allavega ekki til með að sitja einn yfir jólasteikinni eins og ég var farinn að leiða hugann að.

Jólin hérna í Hollandi byrja snemma. Sinterklas (sá hinn sami og ameríski jólasveinninn, Santa Claus, er byggður á) kemur í bæinn í lok nóvember og með honum fylgja nokkrir negrasveinar, hjálparar hans, sem bera einkennilega allir sama nafnið: Zwarte Piet (Svarti Pétur). En Svarti Pétur, eða sá sem tekur að sér hlutverk Svarta Péturs skulum við segja, má aldrei vera þeldökkur maður í raun, því slíkt þykir falla undir fordóma gagnvart hörundsdökku fólki. Þess vegna eru Svartir Pétrar ávalt leiknir af hvítum mönnum sem skella skósvertu í andlitið á sér, setja á sig rauðan varalit og klæða sig í litskrúðuga búninga samkvæmt fornum, spænsku sið (Sinterklaas og hjálparar hans eru neflinlega, samkvæmt þjóðsögunni, ættaðir frá Spáni og búa þar árið um kring, þar til þeir sigla yfir til Hollands fyrir jólin). Það er auðvitað enginn rasismi falinn í slíkri múnderingu! Síðan fá börnin gjafir og halda upp á sín “Sinterklaas” jól þann 5. desember. Hin eiginlegu jól eru svo auðvitað líka haldin á hefðbundnum tíma, þann 25. desember, þannig að Hollendingar fá eiginlega tvöfaldan skammt af þessu á hverju ári.

Og þar sem þetta byrjar svona snemma þá fyrirgefur maður alveg forskotið sem auglýsendur taka á jólin hérna megin Atlantshafsins, annað en á Íslandi þar sem það jaðrar við hallæri hversu snemma búðir byrja að auglýsa jólin og jólalög fara að heyrast á öldum ljósvakans.

En hvað sem því líður, þá er ég allavega löngu kominn í jólaskap. Ég færi þó aldrei að spila jólalög eða skreyta hjá mér fyrr en 1. desember. En þar sem sú dagsetning er nú runnin upp er jólalagaplaylistinn minn farinn að rúlla og held ég að sé alveg tilvalið að deila einum gullmola með ykkur. Þetta er hið æðisígilda jólalag Jingle Bells, sem margir hafa tekið upp á sína arma en fáir gert með jafnskemmtilegum árangri og konungur jólatónlistarinnar, sjálfur Bing Crosby.

Fleiri jólalögum deili ég svo með ykkur á næstunni.