Lausnir við tónlistargetraun #5

Þá liggja fyrir niðurstöður tónlistargetraunar #5. Alls bárust mér ágiskanir frá 9 þátttakendum en tveir þessara þátttakenda tóku þátt sameiginlega. Reyndist þetta vera erfiðasta getraunin til þessa, miðað við stigafjölda keppenda að minnsta kosti.

Keppendur voru þessir:

• Andri Þór Theodorsson
• Arnar Valgeir Sigurjónsson
• Ástþór Ágústsson
• Helgi Ólafsson
• Hildur Sævaldsdóttir & Eyvindur Ingi Steinarsson
• Jón Helgi Gíslason
• Valur Freyr Eiðsson
• Þóranna Hrönn Þórsdóttir

Og hér koma rétt svör:

#1. Electric Light Orchestra – Showdown
Helgi var sá eini sem hlaut 3 stig fyrir þetta, gat bæði flytjanda og lag, en Hildur & Eyvi voru með ELO á hreinu. Arnar giskaði á Isak Hayes og Valur taldi þetta vera Eric Clapton. Ekki slæmar ágiskanir en heldur ekki réttar. Aðrir skiluðu auðu.

#2. Cure – Close to Me
Sígildur 80s smellur hér á ferð með guðföður gotharanna í fararbroddi, Robert Smith. Það voru allir með það á hreinu að þetta væru The Cure en Ástþór og Arnar voru ekki með það hvað lagið héti. Andri Þór hélt reyndar að lagið héti Close to You, sem ég læt sleppa.

#3. Deep Purple – Burn
Þetta lag er hreint meistaraverk úr smiðju 70s rokksenunnar, eins og það gerist best bara. Arnar og Þóranna fengu bæði 3 stig fyrir réttar tillögur hér. Helgi kom með skemmtilega ágiskun um að þetta væri hljómsveitin The Nice og að lagið héti Rondo og Valur giskaði á að þetta væri eitthvað með Jethro Tull. Aðrir giskuðu ekki.

#4. Bon Jovi – Always
Þetta voru allir með rétt, nema Andri Þór, sem giskaði ekki einu sinni. Hann kallaði þetta bara “drasl”.

#5. Poison – Unskinny Bop
Þetta hélt ég einmitt að allir myndu hafa, enda eitt af vinsælustu lögum heims á sínum tíma. Arnar, Ástþór, Jón Helgi, Helgi og Hildur & Eyvi voru reyndar með þetta á hreinu, en Valur, Andri Þór og Þóranna höfðu ekki hugmynd og skiluðu auðu.

#6. Tom Petty & The Heartbreakers – American Girl
Þóranna var sú eina sem gat þetta rétt, sem kom mér á óvart, því hélt að fleiri myndu hafa þetta. En allavega vel gert, Þóranna. Arnar hélt að þetta væri jafnvel eitthvað með Steppenwolf meðan aðrir létu það vera að koma með ágiskanir á þetta.

#7. Placebo – Pure Morning
Frábært lag og mjög lýsandi fyrir tónlistina sem var í gangi seinni hluta tíunda áratugarins. Þóranna, Helgi og Hildur & Eyvi giskuðu ekki á þetta, en aðrir höfðu þetta rétt. Ég gat samt ekki gefið Andra Þór fullt hús fyrir þetta, því hann taldi lagið heita Friend in Need. Það kemur vissulega fram í textanum en það er ekki réttur titill, því miður. En hann Andri fær allavega eitt stig þarna fyrir að geta Placebo.

#8. Sone Temple Pilots – Plush
Þetta var gefins og bjóst ég við að allir hefðu þetta rétt. Sem varð raunin, fyrir utan það að Valur var með lagið vitlaust. Hann hélt að þetta væri Interstate Love Sing en það er allt annað lag með sömu hljómsveit. Valur fékk eitt stig hér meðan aðrir fengu þrjú.

#9. Kinks – Victoria
Þetta var sjálfsagt erfiðasta lagið í getrauninni og bjóst ég alveg eins við því að enginn myndi hafa þetta rétt. Maður verður að lauma einu svona erfiðu með í hverja getraun og í þetta skiptið var það gamli góði Kinks slagarinn. Sá eini sem hafði þetta rétt var Helgi Ólafs og fær hann lof fyrir það. Arnar hélt að þetta væri kannski eitthvað með Grateful Dead og Valur giskaði á Dire Straits. Aðrir giskuðu ekki.

#10. Fool’s Garden – Lemon Tree
Að lokum var svo hér eitt lauflétt sem allir höfðu rétt, nema Andri Þór. Hann var reyndar með lagatitilinn réttan, sem hann fær eitt stig fyrir, en hann giskaði á að þetta væri hljómsveitin Blind Melon. Held hann sé að rugla þarna saman orðunum Lemon og Melon, sem er svo sem alveg skiljanlegt.

Stigin féllu sem hér segir:

• 1. Helgi – 21
• 2. Arnar Valgeir – 19
• 3. Jón Helgi – 18
• 4. Þóranna – 18
• 5. Ástþór – 16
• 6. Hildur & Eyvi – 16
• 7. Valur – 13
• 8. Andri Þór – 8

Jón Helgi og Þóranna voru með jafnmörg stig, sem og Ástþór og Hildur & Eyvi. Í slíkum tilfellum gildir það að sá sem skilaði svörum sínum fyrst lendir í hærra sætinu.

Og þar með er það orðið ljóst að Helgi Ólfasson er sigurvegari tónlistargetraunar #5 á AndriHugo.com. Helgi er vel að titlinum kominn, enda fór hann í þriggja mánaða æfingabúðir til Súrínam fyrir keppnina og lagði blóð svita og tár í þátttöku sína að þessu sinni. Hjartanlegar hamingjuóskir, Helgi Ólafsson!

Tónlistargetraun #5

Þá er komið að tónlsitargetraun #5 hérna á AndriHugo.com. Ég hef ekki verið með getraun að neinu tagi síðan rétt fyrir jólin síðustu, svo þetta er löngu orðið tímabært. Ég er búinn að fá þónokkrar fyrirspurnir síðan þá um það hvenær von sé á næstu getraun, þannig að það er greinilega einhver áhugi fyrir þessu. Og þar sem ég er að pósta þessu á Facebook líka er ég að vonast eftir sæmilegri þáttöku.

Getraunin samanstendur af 10-15 sekúndna brotum úr 10 lögum sem ég hef klippt saman í eina langa runu. Í brotunum eru engir textar, aðeins laglínur, sóló og melódíur sem ættu að kveikja á perunni hjá öllum. Og eins og alltaf vil ég fá ágiskanir frá sem flestum, alveg sama hversu vel eða illa þið haldið að þið hafið staðið ykkur. Sumt af þessu er auðvelt og annað sjálfsagt örlítið erfiðara, en svarið bara því sem þið haldið að þið getið og giskið svo á restina. Það eru alls ekki margir sem eru með þetta allt saman á hreinu! Því fleiri sem taka þátt, því skemmtilegri verður leikurinn, enda er leikurinn fyrst og fremst til þess gerður að hafa gaman af honum.

Stigagjöfinni er þannig háttað:

Réttur flytjandi = 1 stig
Rétt nafn á lagi = 1 stig
Réttur flytjandi og rétt nafn á lagi = 3 stig

Mest er hægt að fá 30 stig í heild fyrir að giska rétt á alla flytjendur og heiti allra laga.

Getraunina má nálgast með því að smella hér eða einfaldlega smella á play hér fyrir neðan.

Svör berist svo til mín á MSN eða í gegnum e-mail (hvoru tveggja er andrihugo [hjá] hotmail.com). Einnig má senda svörin til mín í einkaskilaboðum á Facebook. Vinsamlegast svarið ekki í comentakerfið, hvorki hér á blogginu né á Facebook!

Do it!

Það munar ekki um það!

Það er enginn smá hraði maður…

Sumarflensa

Það er nú ekki það sekmmtilegasta að hanga inni á góðum sumardögum með einhverja skíta flensu. En þannig er þessi vika búin að vera meira og minna, búinn að vera hundslappur, með einhverja bullandi pest. Þetta er víst að ganga núna, þekki ýmsa aðra sem hafa lent í þessu og marga hverja mun verr en ég. Ég missti ekki nema einn dag úr vinnu, svo þetta gæti alveg verið verra. En það er samt hundfúlt að geta ekki notið útiverunnar meðan veðrið er sæmilega gott. Frekar að spara þessa veikindadaga þar til að viðrar illa, en maður ræður víst hvenær maður lendir í þessu. Náttúran er óútreiknanlegt fyrirbæri.

En þó maður hangi inni er ekki þar með sagt að maður sé aðgerðarlaus. Ég hef bara verið að vinna í mínum eigin verkefnum heimafyrir á meðan, helst í innskönnun slides mynda. Það kemur sér vel að það skuli vera nóg að gera hjá mér í þeim efnum þessa dagana. Og meðan á innskönnun stendur er maður auðvitað endalaust með mússík við eyrun. Það sem ég hef helst verið að hlusta á þessa dagana er t.d. nýja platan með Samma úr Jagúar. Þvílíkur snillingur þar á ferð og nýja platan hans er algjört gull fyrir þá sem hafa áhuga á fönk-tónlist á annað borð. Söngkona að nafni Feist hefur einnig loðað við hlustir mínar mikið undanfarna daga, kanadísk yngismær með alveg sérstaklega fallega og skemmtilega rödd. Nýja platan hennar, The Reminder, hefur verið að gera góða hluti og ekki af neinni tilviljun; alveg stórfín plata.

En það sem hefur vakið hvað mesta kátínu hjá mér undanfarna daga er tónlistin hans Mason Jennings. Mason er amerískur gítarleikari og lagasmiður, spilar svona þjóðlaga-rokk blöndu einhverja sem hljómar alveg einstaklega vel. Hann hefur gefið út einar 6 breiðskífur en hefur þó aldrei verið á mála hjá stórri plötuútgáfu. Þrátt fyrir það hefur hann vakið þónokkra athygli og hlotið mikið fylgi í heimalandi sínu, sem og víðar um heim. Lag vikunnar er af plötu hans frá árinu 2004, Use Your Voice, og heitir Ulysses.

Í kvöld stendur svo til að bruna út í Klettsvík með peyjunum, slá upp varðeldi og grilla og éta og drekka og spila á gítar og syngja og skemmta sér sem aldrei fyrr. Um að gera að komast aðeins út í guðsgræna náttúruna eftir slenið og viðbjóðinn í vikunni!

Patrick Stewart í Extras

Lausn við myndagátu #16

Alltaf lofa ég því að næsta myndagáta verði erfiðari en sú á undan henni og alltaf mistekst mér það. Þið eruð greinilega bara svona ofboðslega skörp (allavega flest ykkar). Flestir giskuðu rétt í þetta skitpið eða því sem næst rétt. Sum svörin eru svolítið loðin en þau sleppa nú samt flest held ég. Ég náði nú samt að plata einhverja þarna inn á milli og með því er takmarkinu náð. Takmarkið er jú að plata ykkur, eða allavega að láta ykkur hafa fyrir því að giska rétt.

Lausnin er sem sagt þessi:

• Ágiskanir:
  • Arndís – Riffill eða haglabyssa
  • Aron Smári – Pensill
  • Ástþór – Riffill
  • Beggi – Riffil- eða haglabyssuskefti
  • Boggi – Haglabyssuskaft
  • Daði Guðjóns – Leikfangariffill
  • Davíð Egisl – Riffill
  • Einir – Skefti á haglabyssu
  • Haffi Halldórs – Skefti á haglabyssu
  • Helgi Ólafs – Gúmmískotariffill eins og maður keypti á þjóðhátíð í denn
  • Kári Yngva – Byssuskaft
  • Lokesh – Göngustafur
  • Raggi Ben – Byssuskapt á riffli
  • Rósa Gunnars – Haglabyssuskaft
  • Sindri Freyr – Byssuskefti
  • Sóley – Riffill
  • Tóta – “Afa” göngustafur
  • Þórir – Byssuskefti

Aron Smári kom með fyrstur með ágiskun en hann svaraði ekki rétt. Svo ekki vinnur hann þessa umferð. Það var hins vegar Boggi “Bæjó” sem átti kollgátuna fyrstur manna og hlýtur hann því hnossið í þessari umferð. Til hamingju með það, Borgþór.

Svo er það auðvitað bara tónlistargetraun #3 næst. Best að hafa þessar getraunir bara til skiptis.

Vei!

Það var mikið að sólin minnti aðeins á sig!

Nýtt með QOTSA

Nýja platan með Queens of the Stone Age, Era Vulgaris, kemur út í næstu viku. En hún er auðvitað löngu komin á netið, enda geta gagnrýnendur og útvarpsstarfsmenn ekki setið á sér þegar þeir fá prómó-eintök í hendurnar. Þetta er orðið þannig að nánast allar plötur, stórar sem litlar, leka á netið einhverjum vikum fyrir tilsetta útgáfu. Það er spurning hvernig má komast hjá þessu og hvort það sé yfir höfuð hægt. Þetta er a.m.k. eitthvað sem útgefendur berjast hörðum höndum við að koma í veg fyrir en þetta virðist samt alltaf enda í sama pakkanum. Sjálfur sæki ég nú yfirleitt þær plötur sem ég hlakka til að heyra ef þær leka á netið, en mér þykir þetta samt leiðinlegt ástand og vonandi að þetta breytist eitthvað til hins betra í framtíðinni.

Allavega, aftur að nýju QOTSA plötunni. Dúndurgóð plata alveg hreint, ekki þeirra besta plata en hún stendur alveg undir væntingum samt. Það er ekki hægt að ætlast til þess að svona hljómsveitir gefi út epískt meistaraverk í hvert einasta skipti sem þær fara í hljóðver. En þessi plata er engu að síður alveg stórskemmtileg og hressandi svo um munar. Josh Homme slær ekki slöku við frekar en fyrri daginn, þessi maður er snillingur. Hann er riffa-kóngur okkar kynslóðar, eins og James Hetfield í Metallica var á undan honum. Ótrúlegur tónlsitarmaður.

Lag vikunnar er auðvitað af þessari plötu og ber nafnið Misfit Love. Brakandi ferskt og fjörugt rokk sem kemur hreifingu á mjöðmina.

Bílagræjunum stolið

Hún mamma fór upp á land um helgina og tók bílinn með sér. Viti menn, bíllinn er eina helgi í Reykjavík og það er brotist inn í hann! Alveg dæmigert. Voðalegt afbrotabæli er þessi soraborg að verða. En ég veit nú samt ekki hvað vakti fyrir þessum moðhausi sem braust inn í bílinn okkar. Það eina sem hann stal var fronturinn af bílagræjunum… eins og hann hafi eitthvað við hann að gera! Allt annað var látið vera, iPod græja sem sem ég nota til að tengja iPodinn við bílinn, sjónauki, geisladiskar og ýmsilegt annað. Enginn fengur í þessum hlutum greinilega, en fronturinn á bílagræjunni? Þar er sko happahnoss á ferðinni! Andskotans fávitar.

Þessi þjófnaður þjónar þjófnum akkúrat engum tilgangi (nema hann eigi alveg nákvæmlega eins bíltæki og var í bílnum, sem ég ætla að leyfa mér að efast um) og þetta veldur mér mikilli gremju, því frontlaus hef ég lítið við restina af bílagræjunni að gera. Og ef ég vil kaupa mér nýjan front þá kostar hann alveg lágmark 20.000 krónur, sem er meira en nýjar bílagræjur kosta! Hvaða vitleysa er þetta eiginlega? Varahluturinn kostar meira en tækið sjálft! Haldiði að þetta sé nú vitleysa, maður!?

Ojæja, svona er þetta víst bara. Bílaþjófar munu víst alltaf fyrirfinnast og það er víst ekki hægt að ætlast til að þetta sé greindasta fólkið á götunni. En nú vantar mig nýjar bílagræjur. Vona að tryggingarnar nái yfir þetta… það hlýtur bara að vera. En mælir einhver með einhverjum sérstökum græjum?