Lausnir við tónlistargetraun #5

Þá liggja fyrir niðurstöður tónlistargetraunar #5. Alls bárust mér ágiskanir frá 9 þátttakendum en tveir þessara þátttakenda tóku þátt sameiginlega. Reyndist þetta vera erfiðasta getraunin til þessa, miðað við stigafjölda keppenda að minnsta kosti.

Keppendur voru þessir:

• Andri Þór Theodorsson
• Arnar Valgeir Sigurjónsson
• Ástþór Ágústsson
• Helgi Ólafsson
• Hildur Sævaldsdóttir & Eyvindur Ingi Steinarsson
• Jón Helgi Gíslason
• Valur Freyr Eiðsson
• Þóranna Hrönn Þórsdóttir

Og hér koma rétt svör:

#1. Electric Light Orchestra – Showdown
Helgi var sá eini sem hlaut 3 stig fyrir þetta, gat bæði flytjanda og lag, en Hildur & Eyvi voru með ELO á hreinu. Arnar giskaði á Isak Hayes og Valur taldi þetta vera Eric Clapton. Ekki slæmar ágiskanir en heldur ekki réttar. Aðrir skiluðu auðu.

#2. Cure – Close to Me
Sígildur 80s smellur hér á ferð með guðföður gotharanna í fararbroddi, Robert Smith. Það voru allir með það á hreinu að þetta væru The Cure en Ástþór og Arnar voru ekki með það hvað lagið héti. Andri Þór hélt reyndar að lagið héti Close to You, sem ég læt sleppa.

#3. Deep Purple – Burn
Þetta lag er hreint meistaraverk úr smiðju 70s rokksenunnar, eins og það gerist best bara. Arnar og Þóranna fengu bæði 3 stig fyrir réttar tillögur hér. Helgi kom með skemmtilega ágiskun um að þetta væri hljómsveitin The Nice og að lagið héti Rondo og Valur giskaði á að þetta væri eitthvað með Jethro Tull. Aðrir giskuðu ekki.

#4. Bon Jovi – Always
Þetta voru allir með rétt, nema Andri Þór, sem giskaði ekki einu sinni. Hann kallaði þetta bara “drasl”.

#5. Poison – Unskinny Bop
Þetta hélt ég einmitt að allir myndu hafa, enda eitt af vinsælustu lögum heims á sínum tíma. Arnar, Ástþór, Jón Helgi, Helgi og Hildur & Eyvi voru reyndar með þetta á hreinu, en Valur, Andri Þór og Þóranna höfðu ekki hugmynd og skiluðu auðu.

#6. Tom Petty & The Heartbreakers – American Girl
Þóranna var sú eina sem gat þetta rétt, sem kom mér á óvart, því hélt að fleiri myndu hafa þetta. En allavega vel gert, Þóranna. Arnar hélt að þetta væri jafnvel eitthvað með Steppenwolf meðan aðrir létu það vera að koma með ágiskanir á þetta.

#7. Placebo – Pure Morning
Frábært lag og mjög lýsandi fyrir tónlistina sem var í gangi seinni hluta tíunda áratugarins. Þóranna, Helgi og Hildur & Eyvi giskuðu ekki á þetta, en aðrir höfðu þetta rétt. Ég gat samt ekki gefið Andra Þór fullt hús fyrir þetta, því hann taldi lagið heita Friend in Need. Það kemur vissulega fram í textanum en það er ekki réttur titill, því miður. En hann Andri fær allavega eitt stig þarna fyrir að geta Placebo.

#8. Sone Temple Pilots – Plush
Þetta var gefins og bjóst ég við að allir hefðu þetta rétt. Sem varð raunin, fyrir utan það að Valur var með lagið vitlaust. Hann hélt að þetta væri Interstate Love Sing en það er allt annað lag með sömu hljómsveit. Valur fékk eitt stig hér meðan aðrir fengu þrjú.

#9. Kinks – Victoria
Þetta var sjálfsagt erfiðasta lagið í getrauninni og bjóst ég alveg eins við því að enginn myndi hafa þetta rétt. Maður verður að lauma einu svona erfiðu með í hverja getraun og í þetta skiptið var það gamli góði Kinks slagarinn. Sá eini sem hafði þetta rétt var Helgi Ólafs og fær hann lof fyrir það. Arnar hélt að þetta væri kannski eitthvað með Grateful Dead og Valur giskaði á Dire Straits. Aðrir giskuðu ekki.

#10. Fool’s Garden – Lemon Tree
Að lokum var svo hér eitt lauflétt sem allir höfðu rétt, nema Andri Þór. Hann var reyndar með lagatitilinn réttan, sem hann fær eitt stig fyrir, en hann giskaði á að þetta væri hljómsveitin Blind Melon. Held hann sé að rugla þarna saman orðunum Lemon og Melon, sem er svo sem alveg skiljanlegt.

Stigin féllu sem hér segir:

• 1. Helgi – 21
• 2. Arnar Valgeir – 19
• 3. Jón Helgi – 18
• 4. Þóranna – 18
• 5. Ástþór – 16
• 6. Hildur & Eyvi – 16
• 7. Valur – 13
• 8. Andri Þór – 8

Jón Helgi og Þóranna voru með jafnmörg stig, sem og Ástþór og Hildur & Eyvi. Í slíkum tilfellum gildir það að sá sem skilaði svörum sínum fyrst lendir í hærra sætinu.

Og þar með er það orðið ljóst að Helgi Ólfasson er sigurvegari tónlistargetraunar #5 á AndriHugo.com. Helgi er vel að titlinum kominn, enda fór hann í þriggja mánaða æfingabúðir til Súrínam fyrir keppnina og lagði blóð svita og tár í þátttöku sína að þessu sinni. Hjartanlegar hamingjuóskir, Helgi Ólafsson!

Tónlistargetraun #5

Þá er komið að tónlsitargetraun #5 hérna á AndriHugo.com. Ég hef ekki verið með getraun að neinu tagi síðan rétt fyrir jólin síðustu, svo þetta er löngu orðið tímabært. Ég er búinn að fá þónokkrar fyrirspurnir síðan þá um það hvenær von sé á næstu getraun, þannig að það er greinilega einhver áhugi fyrir þessu. Og þar sem ég er að pósta þessu á Facebook líka er ég að vonast eftir sæmilegri þáttöku.

Getraunin samanstendur af 10-15 sekúndna brotum úr 10 lögum sem ég hef klippt saman í eina langa runu. Í brotunum eru engir textar, aðeins laglínur, sóló og melódíur sem ættu að kveikja á perunni hjá öllum. Og eins og alltaf vil ég fá ágiskanir frá sem flestum, alveg sama hversu vel eða illa þið haldið að þið hafið staðið ykkur. Sumt af þessu er auðvelt og annað sjálfsagt örlítið erfiðara, en svarið bara því sem þið haldið að þið getið og giskið svo á restina. Það eru alls ekki margir sem eru með þetta allt saman á hreinu! Því fleiri sem taka þátt, því skemmtilegri verður leikurinn, enda er leikurinn fyrst og fremst til þess gerður að hafa gaman af honum.

Stigagjöfinni er þannig háttað:

Réttur flytjandi = 1 stig
Rétt nafn á lagi = 1 stig
Réttur flytjandi og rétt nafn á lagi = 3 stig

Mest er hægt að fá 30 stig í heild fyrir að giska rétt á alla flytjendur og heiti allra laga.

Getraunina má nálgast með því að smella hér eða einfaldlega smella á play hér fyrir neðan.

Svör berist svo til mín á MSN eða í gegnum e-mail (hvoru tveggja er andrihugo [hjá] hotmail.com). Einnig má senda svörin til mín í einkaskilaboðum á Facebook. Vinsamlegast svarið ekki í comentakerfið, hvorki hér á blogginu né á Facebook!

Nýtt og betra bloggkerfi

Góðir hálsar, leyfið mér að kynna fimmtu útgáfu bloggsins á AndriHugo.com. Nú er ég búinn að færa bloggið yfir á WordPress kerfið, kerfi sem ég hef lengi ætlað að skipta yfir í en einhverra hluta vegna aldrei látið verða að því… fyrr en nú! Og það sem meira er að þar sem WordPress býður upp á margfalt betri yfirflutningsmögleika milli bloggkerfa en önnur kerfi sem ég hef notað, þá eru allar bloggfærslur mínar frá upphafi núna inn á eina og sama staðnum, allt frá því ég byrjaði að blogga í október 2003. Þetta er allt annað líf, hægt að leita í öllur ruglinu í mér langt aftur í tímann og svona. Magnað alveg. En það versta er að commentin fluttust ekki á milli kerfa, sem er frekar skítt. Það væri öllu meira vesen að færa þau yfir, svo ég lét það eiga sig. En það verður að hafa það, lítil fórn svona heilt á litið.

En það er annars allt gott að frétta bara. Sumarfríið var stórkostlegt, frábært að komast aðeins heim í sumar og það var alveg yfirdrifið nóg að gera hjá mér þær þrjár vikur sem ég var í Eyjum. Þjóðhátíðin var með allra besta móti, frábært veður allan tímann og virkilega góður andi yfir hátíðinni í ár. Fyrir utan hátíðina var ég bara í góðu yfirlæti á heimaslóðum, tók þátt í Þjóðhátíðarútvarpi Gufunnar, setti saman Þroskahefti með félögunum, kíkti í heyskap með Látrunum og margt fleira. Frábært sumarfrí alveg og gott meðal fyrir sálina, alltaf gott að komast aðeins heim.

Eftir að ég kom svo aftur út til Amsterdam tók við heljarinnar verkefnavinna fyrir skólann. Það fylgdi því auðvitað hið vanalega stresskast en það hafðist fyrir rest að skila öllu af sér á réttum tíma, eins og það gerir nú alltaf (7-9-13). Ég fór líka á Lowlands mússíkfestivalið sem starfsmaður yfir eina helgi, sem var alveg stórskemmtilegt. Lowlands er stærsta tónlistarhátíð Hollands og ég var þar að vinna sem aðstoðamaður í upptökuvagni að taka upp hljómsveitir á einu sviðinu. Mikil vinna en virkilega gaman að taka þátt í þessu og sjá hvernig þetta fer allt saman fram. Maður fékk líka smá tíma aflögu milli atriða til að rölta um svæðið og skoða bönd á öðrum sviðum og sá ég meðal annars Them Crooked Vultures, sem var alveg svakalegt! Ef þið hafið ekki heyrt um það band þá verðið þið að bæta úr því. Hæpið í kringum þá er með ólíkindum og þeir eru ekki einu sinni búnir að gefa út eitt einasta lag! En það er líka alveg stórverðskuldað hæp skal ég segja ykkur! Platan þeirra kemur út í október og bíð ég spenntur eftir þeirri útgáfu!

Annars er ég kominn í stutt frí núna frá skólanum. Við fáum fjórar vikur í svokallað “work placement”, eiginlegur starfsþjálfunarmánuður þar sem okkur er ætlað að finna vinnu á okkar sviði og vinna 100 klukkustundir í interneship. En þar sem ég vann mitt internship hjá Rooms of Red Bull í allt sumar (lesið síðustu færslu fyrir frekari upplýsingar um það), þá þarf ég ekki að hafa áhyggjur af því núna og fæ þess vegna bara stutt frí í staðin. RoRB ævintýrið er líka á enda, svo ég get leyft mér að slaka aðeins á í nokkrar vikur. Maður byrjar kannski að huga að lokaverkefninu á meðan…? Aldrei að vita!

Hef þetta ekki lengra í bili, vildi bara láta heyra í mér og prófa nýja bloggkerfið. Á aðeins eftir að ditta að smáatriðum útlistlega séð, þannig að þið afsakið bullið hérna í hliðardálkinum um sinn. Á eftir að ákveða hvernig það kemur til með að líta út endanlega. En á næstunni mun ég henda hingað inn nýrri tónlistargetraun, svo það er eins gott að vera með á nótunum!

Fésbókin drap bloggstjörnuna

Jæja gott fólk, mikið er nú langt síðan maður leit heyra í sér hérna. Ég held hreinlega að Smettisskruddan sé búin að drepa niður mest alla bloggstemningu sem ríkti hér á öldum internetsins áður fyrr. Þannig er það allavega í mínu tilfelli. Maður lætur sér nægja að uppfæra statusinn á Facebook og pósta þar sniðugum myndböndum og greinum og öðru eins sem maður var vanur að nýta bloggið sitt í. Maður hefur líka tekið eftir að aðrir bloggara eru orðnir mikið latari við sína iðju á síðustu mánuðum, svo ég er greinilega ekki einn um þetta. En allt er víst breytingum háð sagði skáldið og hvort þessar breytingar séu af hinu góða eða slæma verður hver og einn að dæma fyrir sig.

En það hefur auðvitað margt drifið á mína daga á þessu rúma hálfa ári sem ég hef verið fjarri bloggveröldinni. Ég var búinn að lofa mér að henda einhverjum pistli hérna inn áður en ég færi heim í sumarfrí og held ég að það verði ekki mikið tæpara en þetta. Ég sit einmitt á Schiphol flugvellinum í Amsterdam núna, er að sötra Heineken í gleri og drep tímann á internetinu meðan ég bíð eftir að flugið mitt fari í loftið. Þannig að það er jafngóður tími núna eins og hver annar að láta heyra aðeins í sér.

Í Amsterdam gengur mér allt í haginn bara. Skólinn gengur vel, nóg að gera á köflum (milli þess sem það hefur verið frekar lítið að gera) og í sumar hef ég verið að vinna starfsþjálfun mína í Rooms of Red Bull í Rauðahverfinu. Þar er SAE, skólinn sem ég nem við, búinn að koma upp stúdíói í samvinnu við Red Bull Music Academy og erum við nokkrir nemendur úr skólanum þar að vinna internship vinnu, sem er skilda fyrir námið. Það er drullufínt alveg, maður kynnist nýju og skemmtilegu fólki úr “bransanum” í hverri viku og er að vinna við það sem maður er að læra. Gúddsjitt.

Annars kíkti ég á Rock Werchter mússíkhátíðina í Belgíu í byrjun júlí. Þær Þóranna og María kíktu í heimsókn til mín og komu með á hátíðina auk fjölda annarra Íslendinga. Við vorum alveg 12-15 klakabúar saman í hóp á tjaldsvæðinu, þekktumst reyndar ekki nærri öll fyrir en kynntumst bara hvoru öðru í leiðinni.

Hátíðin sjálf var stórkostleg og þær hljómsveitir sem stóðu upp úr voru meðal annars Metallica, Coldplay, Kings of Leon, Fleet Foxes, Bloc Party, Oasis, Saesick Steve og Elbow svo eitthvað sé nefnt. Emiliana Torrini var þarna líka með sitt show, sem var alveg frábært. Hún er ansi efnilegur artisti verð ég að segja og er greinilega að hasla sér völl almennilega á erlendri grundu, enda fékk hún svakalegar undirtekktir og virtust flestir þekkja efnið hennar vel.

En eins og ég sagði, þá er ég staddur á flugvellinum í augnablikinu og er á leiðinni heim í rúmlega þriggja vikna sumarfrí. Við fáum þrjár vikur í sumar, miðað við þær tvær vikur sem við fáum yfirleitt í sumar/jólafrí. Þessi aukavika kemur sér asskoti vel þar sem hún bætist við strax eftir Þjóðhátíðina. Annars hefði ég þurft að rjúka beint aftur út strax eftir Þjóðhátíð eins og í fyrra, sem var alveg ferlegt! Svo þetta verður án efa ærlegt sumarfrí!

Jæja, ég læt þetta duga í bili og lofa nú að láta heyra í mér hérna eitthvað oftar en með hálfsárs millibili í framtíðinni! Ég er með tónlistargetraun í bígerð og eitthvað annað skemmtilegt, svo fylgist grannt með málum hér á næstu vikum og mánuðum. Ég lofa meira lífi hér en verið hefur.

Hafið það annasr bara gott og við sjáumst í Eyjum á komandi vikum!

Lausnir við tónlistargetraun #4

Þá hafa mér borist ágiskanir frá sjö þátttakendum í tónlistar-getrauninni. Ég hefði reyndar viljað sjá fleiri taka þátt en þetta er nú samt alveg hin sæmilegasta þáttaka.

Keppendur voru þessir:

• Ari Guðmunds
• Arnar Valgeir
• Ástþór
• Boggi
• Henry
• Jón Helgi
• Þóranna

Og hér koma rétt svör:

#1. Reef – Place your hands
Fjórir þáttakendur með þetta rétt, þrír með rangt. Arnar giskaði á She’s My Sister með Stone Roses, Henry giskaði á eitthvað með Dave Matthews Band og Ari skilaði auðu.

#2. Crash Test Dummies – Afternoons & Coffeespoons
Klassískur smellur frá 90s bandinu með djúpraddaða söngvarann. Arnar og Ari skiluðu auðu á þetta lag, aðrir voru með þetta á hreinu.

#3. Men at Work – Down Under
Einslagsundirð frá Ástralíu. Mjög 80s. Þetta voru allir með rétt, þótt sumir hafi ekki verið með titilinn alveg á hreinu. Land Under, Land Down Under og Down Under voru þó allt saman fullnægjandi ágiskanir.

#4. The Hives – Hate to Say I Told You So
Arnar og Ástþór héldu báðir að þetta væri Song 2 með Blur en aðrir svöruðu þessu rétt.

#5. Gary Glitter – Rock & Roll, Part 2
Þetta átti að vera rosa erfitt en reyndist auðveldara en ég hélt, þar sem fjórir voru með rétta lausn við þessu. Jón Helgi giskaði á eitthvað með Ozzy, Bogga fannst þetta hljóma eins og Talking Heads en var ekki alveg viss og Ástþór giskaði nokkuð skemmtilega á að þetta væri lagið Hey með The Wumwum Band.

#6. Tvíhöfði – La la la la Doddi litli
Þetta var kannski frekar kvikindislegt af mér, bjóst ekki við að neinn myndi geta þetta. En Boggi og Arnar eru greinilega með Tvíhöfðann sinn á hreinu og könnuðust strax við þetta. Þetta lag er reyndar flutt af Sverri Stormsker og Dodda litla, sem ég vissi ekki fyrr en Boggi benti mér á það, en það er allavega á Tvíhöfðaplötunni Til Hamingju svo ég tel þetta sem Tvíhöfðalag. En já, Arar og Boggi gátu þetta sem sagt rétt, Tóta giskaði á eitthvað með Baggalúti, Jón Helgi og Ástþór voru báðir nokkuð nálægt því og giskuðu á að þetta væru Fóstbræður og Ari giskaði einfaldlega á að þetta væri “eitthvað íslenskt”. Henry skilaði auðu.

#7. Garbage – Only Happy When It Rains
Ari, Arnar og Jón Helgi voru með rétta svarið við þessu. Tóta var alveg ofsalega nálægt því, munaði bara einu orði. Hún giskaði á Only Happens When It Rains, sem ég gat því miður ekki gefið rétt fyrir. Henry var með Garbage á hreinu en ruglaðist á lögum og giskaði á Stupid Girl. Boggi giskaði út í bláinn á lagið Nondurkin með hljómsveitinni Durkin Love og Ástþór hélt að þetta væri hljómsveitin Catatonia með lagið Drop Dead Gorgeous.

#8. Jet Black Joe – I, You, We
Þetta var gefins. Allir með þetta rétt.

#9. The Cardigans – Hanging Around
Arnar, Ari og Boggi héldu allir að þetta væri Every You, Every Me með Placebo og Henry giskaði á Radiohead. Aðrir svöruðu réttu.

#10. Muse – New Born
Þetta virtist ekki vefjast fyrir neinum. Allir með þetta rétt.

Stigin féllu sem hér segir:

• 1. Þóranna – 25
• 2. Jón Helgi – 24
• 3. Boggi – 21
• 4. Henry – 19
• 5. Ástþór – 18
• 6. Arnar Valgeir – 18
• 7. Ari Guðmunds – 18

Ástþór, Arnar og Ari voru með jafnmörg stig, en skiluðu inn í þeirri röð sem stigataflan sýnir, Ástþór fyrstur og Ari síðastur.

Og þar með er hún Þóranna Hrönn Þórsdóttir krýndur meistari tónlistargetraunar Andra Hugo í þetta sinn og hefur því tryggt sér montréttinn fram að næstu getraun. Til hamingju með það, Tóta!

Gleðileg jól!

Tónlistargetraun #4

Svona fyrst það eru að koma jól og prófleiðinn sjálfsagt að drepa marga þá held ég að það sé tilvalið að fólk slíti sig frá bókunum og spreyti sig á eins og einni léttri getraun. Þetta er fjórða getraunin sem ég set saman og finn ég fyrir því að það verður erfiðara og erfiðara að setja þær saman eftir því sem þær verða fleiri, þar sem maður fer að verða uppiskroppa með hugmyndir að lögum sem sem flestir ættu að þekkja.

En ég held mér hafi tekist nokkuð vel til með að finna gott jafnvægi milli auðveldra og erfiðra laga í þessari getraun. Maður veit þó aldrei nákvæmlega með það, þar sem stundum vita allir það sem ég held að sé erfitt og fáir þekkja það sem ég hélt að allir gætu. Svo þetta er svolítið tvísýnt oft.

En jæja, þá að leiknum. Getraunin samanstendur af brotum úr 10 lögum sem ég hef klippt saman. Í brotunum eru engir textar, aðeins laglínur, sóló og melódíur sem ættu að kveikja á perunni hjá ykkur. Og, eins og alltaf vil ég fá ágiskanir frá sem flestum, alveg sama hversu vel eða illa þið haldið að þið hafið staðið ykkur. Það eru ekki margir sem eru með þetta allt á hreinu og því þarf enginn að skammast sín fyrir furðulegar ágiskanir. Því fleiri sem taka þátt, því skemmtilegri verður leikurinn.

Stigagjöfinni er þannig háttað:

Réttur flytjandi = 1 stig
Rétt nafn á lagi = 1 stig
Réttur flytjandi og rétt nafn á lagi = 3 stig

Mest er hægt að fá 30 stig í heild fyrir að giska rétt á alla flytjendur og heiti allra laga.

Getraunina má nálgast með því að smella hér eða einfaldlega smella á play hér fyrir neðan.

Svör berist svo til mín á MSN eða í gegnum e-mail (hvoru tveggja er andrihugo[hjá]hotmail.com). Vinsamlegast svarið ekki í comentakerfið!

Netsambandslaus í kreppunni

Komið þið nú öll margblessuð og sæl. Það er orðin drykklöng stund síðan maður henti inn línu hingað á blessað bloggið. Ég held ég hafi bara verið of upptekinn af því að slaka á og hafa það gott í þessu ágætis fríi sem ég fékk heima á íslandi í haust. Hefði svo sem alveg viljað hafa haft meira að gera, en ég dundaði mér jú eitthvað. Hélt t.d. upp á þrítugsafmælið mitt, skellti mér til Reykjavíkur eina helgi og var svo að vinna eitthvað líka. Síldin byrjaði reyndar töluvert seinna en ég hafði vonað, svo ég náði ekki eins miklu af vertíðinni og ég hafði vonað. Náði samt einhverjum 10 vöktum eða svo, sem er betra en ekkert. En nú er ég sem sagt kominn aftur út til Amsterdam og byrjaður í skólanum á nýjan leik.

Það er auðvitað ekki laust við að maður finni herða svolítið að á þessum tímum eins og allir aðrir. Ekki auðvelt að vera á fátæklegum námslánum meðan ástandið er eins og það er, en maður reynir að gera það besta úr því sem maður hefur fyrir framan sig. Maður kemst í gegnum þetta eins og aðrar þrengingar. Það er ferlega fúlt að horfa á hvernig gengi krónunnar veikist og veikist með hverjum deginum en maður verður bara að hugsa jákvætt og horfa fram á við. Er það ekki?

Ég er núna byrjaður að leigja með tveimur nýjum félögum. Hinir peyjarnir, sem ég bjó með á síðasta ári, eru allir farnir aftur heim til Íslands, svo ég varð að finna mér nýja herbergisfélaga. Og það var nú ekki lengi gert. Annar þeirra er Reykvíkingur sem var að byrja í sama námi og ég er í núna í byrjun september. Hinn er Íslendingur að uppruna en hefur búið hér síðan hann var krakki, í einhver 20 ár eða svo. Og saman leigjum við þrír þessa fínu íbúð í vesturhluta Amsterdam. Frábært hverfi sem við erum í og mjög stutt í bæinn. Annað en sveitalífið í norðurhluta Amsterdam eins og í fyrra, sem var reyndar mjög fínt líka, en frekar langt í alla þjónustu og þessháttar.

Netsamband er ekki til staðar á heimilinu eins og er. Það var virkt fyrstu dagana eftir að ég kom aftur út, en stuttu seinna þá hrundi routerinn sem internetþjónustan hafði skaffað okkur og síðan hefur þetta verið eintómt vesen. Ég ætla ekkert að fara út í það í neinum smáatriðum, en þjónustan hjá internetfyrirtækjum hérna er alveg hlægilega léleg. Svo við erum að vesenast í þessu og erum að vonast til að netsamband verði loks komið á fyrir næstu helgi.

Á meðan þarf ég að láta mér duga að kíkja á netkaffi. Það er reyndar ekki langt að fara, bara hérna aðeins neðar í götunni er þetta fínasta netkaffi. Eigandinn er vinalegur múslimi og heitir Mustafa. Þessa stundina er hann einmitt að hlusta á bænirnar sínar í útvarpinu; kyrjandi múslimaprestur flytur bænir og les ritningar úr kóraninum á laugardagseftirmiðdegi, eins og ekkert sé sjálfsagaðara. Og auðvitað er ekkert sjálfsagðara fyrir mann eins og Mustafa.

Jæja, læt þetta duga í bili. Ætla að skella mér í smá hjólreiðatúr á nýja hjólinu sem ég keypti mér í gær. Það er gott veður úti og ferska loftið ákallar mig. Örlítið kalt reyndar, enda kominn vetur og fer að styttast allverulega í jólin. Maður verður bara kominn aftur heim í jólafrí áður en maður veit af!

A muppet death metal special

Hættulegar hjartalaga partíblöðrur

Ég hélt upp á afmæið mitt um helgina, sem var virkilega skemmtilegt og þakka ég þeim sem mættu kærlega fyrir mig. Þetta var alveg ótrúlega gaman. Ég hef ekki haldið formlega upp á afmælið mitt, með veislu og öllu tilheyrandi, síðan ég var 16 ára og bauð nokkrum vinum mínum heim í pizzupartí. Heil 14 ár liðin síðan þá, svo það var alveg kominn tími á þetta. Veisluna hélt ég á Conero, fyrir ofan Café María, og þar skemmtum við okkur, vel valinn og góðmennur hópur fram eftir, þangað til við kíktum yfir í Kiwanis, þar sem Susarar héldu sitt ball. Gott kvöld í flesta alla staði myndi ég segja, fyrir utan blöðruatvikið svokallaða.

Þannig var að ég var að blása upp rauða, hjartalaga blöðru í mestu rólegheitum. Ég var búinn að blása ágætlega í hana, en þó ekki það mikið að hún ætti að springa. En það gerði hún, með miklum kvelli og beint upp við augað á mér. Ég sá þess vegna aðeins hálfa sjón það sem eftir lifið kvölds og augað er ekki ennþá búið að ná sér að fullu. ég sé ennþá nokkuð þokukennt út um vinstra augað auk þess sem ég er frekar aumur í kringum það og á erfitt með að fókusera á hluti nálægt mér án þess að finna svolítið til. En þetta ætti nú að jafna sig á nokkrum dögum. Ef ekki, þá verð ég að kíkja til læknis og athuga hvort eitthvað sé hægt að gera í þessu.

En það fylgir þessu nokkuð merkileg hliðarsaga. Ég talaði við vinkonu mína í gær sem hafði verið í annarri afmælisveislu þetta sama kvöld í Reykjavík. Þar kom alveg eins atvik fyrir vinkonu hennar, sem hafði verið að blása upp nákvæmlega eins rauða, hjartalaga blöðru! Hún slapp reyndar betur en ég, þar sem blaðran sprakk upp við kinnina á henni, en hún var nú samt svolítið aum og skelkuð eftir þetta. Þetta getur ekki verið tilviljun!

Þannig að ég bið ykkur bara um að passa ykkur á rauðum, hjartalaga blöðrum í framtíðinni. Greinilega gölluð vara þarna á ferð.